Hátíðarhöldin tileinkuð eldri borgurum

Hátíðardagskrá á baráttudegi verkafólks í Íþróttahöllinni á Húsavík

Mynd úr safni/framsyn.is

Stéttarfélögin í Þingeyjarsýslum: Framsýn, stéttarfélag – Starfsmannafélag Húsavíkur og Þingiðn, félag iðnaðarmanna, standa fyrir mikilli hátíðardagskrá á baráttudegi verkalýðsins, í dag, 1. maí, á Húsavík. Á vef Framsýnar segi að hátíðin í ár brjóti blað í sögu slíkra hátíðarhalda.

„Eftir því sem við komumst næst er þetta í fyrsta skipti í sögunni, hér á landi, sem hátíðarhöldin á baráttudegi verkalýðsins eru tileinkuð eldri borgurum og baráttu þeirra fyrir bættum kjörum í þjóðfélaginu; baráttu fyrir að loks muni renna upp sá dagur að allir aldraðir lifi áhyggjulaust ævikvöld.

Stéttarfélögin þrjú hafa boðið einum af stofnendum Gráa hersins, Ásdísi Skúladóttur leikstjóra, til að flytja hátíðarræðu dagsins. Hún mun flytja ræðuna sem fulltrúi eldri borgara. Baráttuhópurinn Grái herinn var stofnaður af félögum í Félagi eldri borgara í Reykjavík.

Með þessari ákvörðun vilja stéttarfélögin styðja við baráttu þeirra fjölmörgu eldri borgara sem hafa lagt stéttarfélögum lið í gegnum tíðina og eru nú komnir á eftirlaun; eftirlaun sem mörgum þeirra reynist erfitt að framfleyta sér á vegna þeirra miklu skerðinga sem þeim er gert að sæta vegna löggjafar um eftirlaun frá almannatryggingum,“ segir í tilkynningunni.

Hátíðarhöldin hefjast í dag klukkan 14:00. Nánari upplýsingar um dagskrána má nálgast HÉR