Skila sér síður inn í íþrótta og tómstundastarf

Greinin er liður í Þema #4 Víkurblaðsins: Fjölmenning í Þingeyjarsýslum

Stjórnsýsluhús Norðurþings á Húsavík. Mynd/epe.
:

Íbúum í Norðurþingi sem eru af erlendu bergi brotnir hefur fjölgað mjög undan farin ár, bæði fólki sem dvelur til skemmri tíma á svæðinu en einnig fólki sem hyggst setjast hér að. Iðnaðaruppbygging á Bakka er óumdeilanlega stærsta breytan í þessari þróun. Víkurblaðið fór því á stúfana og spurði Jónas Halldór Friðriksson framkvæmdastjóra Völsungs hvort börn þessa nýju Þingeyinga væru að skila sér af krafti inn í íþróttastarfið hjá félaginu?

Jónas Halldór Friðriksson, framkvæmdastjóri Völsungs. Mynd /epe

„Ég held að það sé óhætt að segja að það hafa ekki margir úr þessum hópi skilað sér inn í íþróttastarfið. Það er að sjálfsögðu öllum opið að koma en því miður hefur það ekki verið að skila sér,“ segir Jónas og kallar eftir því að sveitarfélagið móti sér skýrari stefnu í þessum málum og kynni það sem í boði er og aðgengi að því enda sé starfið öllum opið.

Kjartan Páll Þórarinsson, íþrótta og tómstundafulltrúi Norðurþings. Mynd/epe

 

 

 

Kjartan Páll Þórarinsson, íþrótta og tómstundafulltrúi Norðurþings tekur að mestu leiti undir með Jónasi þó hann viti ekki hverjar tölurnar eru á bak við þetta. „Þetta trend erum við að sjá á landsvísu,“ segir hann og bendir á máli sínu til stuðnings að seint á síðasta ári hafi hann sótt ráðstefnu um þessi mál í Reykjavík. Þar var sérstaklega gert að umtalsefni að eitt póstnúmer í Höfuðborginni skar sig all verulega úr að því leiti að nýting frístundastyrkja var áberandi lakari en annars staðar. Í póstnúmerinu sem um ræðir er hlutfall innflytjenda mun hærra en í öðrum hverfum og styður það við þær grunsemdir að þessi hópur barna er að skila sér síður inn í þetta starf.