Sparisjóður Suður-Þingeyinga veitir 10 milljónir til samfélagslegra verkefna

Hagnaður af rekstri eftir skatta var 153 milljónir króna

Frá aðalfundi Sparisjóðs Suður Þingeyinga.
:

Aðalfundur Sparisjóðs Suður-Þingeyinga ses. var haldinn í Skjólbrekku í Mývatnssveit síðastliðinn fimmtudag.

Í tilkynningu segir að fundurinn hafi verið vel sóttur af stofnfjáreigendum.
Fram kom að rekstur sparisjóðsins gekk vel á liðnu starfsári. Hagnaður af rekstri eftir skatta var 153 milljónir króna. Mestu munaði þar um einskiptistekjur vegna slita á Tryggingasjóði sparisjóðanna en hagnaður eftir skatta án þeirra einskiptistekna var um 79 mkr.

Innlán sparisjóðsins jukust á árinu um 4% og útlán um 18%.
Aðalfundur samþykkti heimild til stjórnar um að auka stofnfé sjóðsins um 80 milljónir króna.

Núverandi stofnfjáreigendur hafa forkaupsrétt til 1. júlí 2019 en heimildin til stofnfjáraukningar gildir til 1. september á næsta ári.

Heildarstofnfé sjóðsins nú er 159 milljónir króna og er í eigu um 400 aðila.
Eins og önnur fjármálafyrirtæki, glímir sparisjóðurinn við að viðhalda nægu eigin fé til að standast kröfur um CAD eiginfjárhlutfall. CAD hlutfall sjóðsins var 17,71% í lok síðasta starfsárs og krafan er nú 17,69%.

Krafan hækkar í 18,19% á þessu ári og verður 19,19% 1. janúar 2020 og 19,44% frá 1. febrúar 2020. Hluti eiginfjárkrafnanna tekur mið af þjóðfélagsaðstæðum og getur breyst með breyttum aðstæðum. Til samanburðar má nefna að sambærileg krafa um CAD hlutfall sparisjóðsins var 8% árið 2008 þegar sjóðurinn stóð af sér efnahagshrunið.

Vegna góðrar afkomu síðasta árs veitir sjóðurinn um 10 milljónir króna til samfélagslegra

Reinhard Reynisson stjórnarmaður með Kristjáni Snæbjörnssyni sem veitti viðtöku styrk til Grana og Þjálfa og Guðbergur Egill Eyjólfsson f.h. Daladýrðar.

verkefna á starfssvæði sínu. Á aðalfundinum voru Hestamannafélögunum Grana og Þjálfa veittur styrkur að fjárhæð 1 milljón króna til eflingar kennslu í hestaíþróttum fyrir börn og unglinga. Einnig var Daladýrð, húsdýragarðinum í Fnjóskadal, veittur styrkur að sömu fjárhæð eða 1 milljón króna.

Ari Teitsson, Anna Karen Arnarsdóttir, Helgi Héðinsson, Ragnheiður Þórhallsdóttir og Reinhard Reynisson, hlutu kjör í stjórn sjóðsins. Fyrsti varamaður er Elísabet Gunnarsdóttir og annar varamaður er sr. Þorgrímur G. Daníelsson.

Hjá sparisjóðnum eru 11 starfsmenn á þremur afgreiðslustöðum, Laugum, Húsavík og í Reykjahlíð.

Sparisjóðsstjóri er Gerður Sigtryggsdóttir.