„Það er gaman að segja frá því að sú þjóðlega íþrótt, skák, hefur aldeilis vaknað til lífsins á haustönn,“ segir á vef Öxarfjarðarskóla. Christoph Wöll, kennari við skólann er hvatamaður að skákmóti sem nemendur jafnt sem starfsfólk skólans tóku þátt í. Guðrún Lilja Dam, skólaliði hefur verið Christoph til halds og trausts við undirbúning og framkvæmd mótsins.

„Þorsteinn Gísli, 9. bekk vann nemendakeppnina þar sem 16 tóku þátt. Guðrún Lilja Dam vann starfsmannakeppni þar sem 6 tóku þátt. Svo kepptu sigurvegari nemenda og sigurvegari starfsmanna um skólameistaratitilinn. Bæði voru mjög spennt og léku hratt. Taflið tók ekki langan tíma og lauk með sigri Guðrúnar Lilju Dam. Það voru sannir íþróttamenn sem tókust í hendur að tafli loknu enda máttu báðir una vel við sitt. Til hamingju bæði tvö, með ykkar árangur,“ segir í frétt skólans.

Mikil vakning hefur orðið í skákíþróttinni í skólanum og kunna nú allir nemendur grunnskólans mannganginn. Segir sagan að margirr þeirra séu orðnir nokkuð slungnir og leggja að velli sér eldri andstæðinga. „Nemanda í 4. bekk þótti ekki leiðinlegt að sigra einn af þeim fremstu meðal fullorðna fólksins,“ segir á vef skólans ogþar er tekið fram mikilvægi þess að börn og fullorðnir tefli saman.

Skák íþróttin nýtur mikilla vinsælda

Öxarfjarðarskóli er samrekin grunn- og leikskóli og eru elstu börn leikskólans nú þegar farin að taka þátt í skákinni. „Kúltúr frímínútna breyttist. Nú má sjá börn eða fullorðna tefla í nánast hverjum frímínútum,“ segir á vef Skólans.

Christoph Wöll segir í samtali við Víkurblaðið að skákíþróttin hafi mikið uppeldislegt gildi enda efli hún rök- og stærðfræðihugsun sem og að þjálfa börn í að hugsa fram í tímann. „Mér finnst börnin læra svo mikið af skákíþróttinni, bara það að þau þurfi að taka í hönd hvers annars og þakka fyrir skákina að leik loknum hefur heilmikið að segja,“ segir hann.

Tekist í hendur að lokinni úrslitaskákinni.