Mynd/Aija Kotleva

Á undanförnum árum hefur skíðagöngudeild Völsungs þróað frábært svæði fyrir skíðagöngu á Reykjaheiði, rétt fyrir ofan Húsavík. Svæðið er einn af fáum stöðum á Íslandi þar sem gera má ráð fyrir snjó allan veturinn á svæði sem er í einungis 10 mínútna fjarlægð frá miðbæ Húsavíkur. Víkurblaðið hefur áður fjallað um skíðasvæðið.

Aðalviðburður hvers árs hjá skíðagöngudeildinni er svokölluð Orkuganga þar sem þátttakendur keppa í 25 km, 10 km og 2,5 km skíðagöngu. Þetta er keppni eða viðburður sem er opinn fyrir alla, fagfólk, byrjendur og alla fjölskylduna.

Lengsta vegalengdin hefst við Þeistareyki og liggur síðan um Reykjaheiði. Keppnin hefur laðað til sín upp í 100 þátttakendur á undanförnum árum.

Á þessu ári eiga þátttakendur kost að á að nýta sér sértilboð hjá Geosea og afslætti í nokkrum verslunum og veitingastöðum á Húsavík. Þátttakendur sem koma lengra að geta nýtt sér sértilboð frá Flugfélaginu Ernir og Fosshótel Húsavík varðandi flug og gistingu.

Í ár verður Orkugangan haldin 13. apríl.  Nánari upplýsingar munu birtast á  Fésbókarsíðu göngunnar og á heimasíðu Orkugöngunnar en búið er að opna fyrir skráningu.

Aija Kotleva kemur að skipulagningu viðburðarins en í samtali við Víkurblaðið lofaði hún skemmtilegu viðburði þar sem allir eiga að geta fundið sér vegalengd við hæfi. Aija hvetur sem flesta til að taka þátt, jafnt byrjendur sem lengra komna.